Mwin la fine lir lé dé, Le Gran ék Le Pti.
Langaz, zèrbaz, tizane nana pi d’sékré pou mwin.

Fami mon zansèt i vé mi ansérv lamou
Pa bozwin ou la pèr mwin la fine ni fou.

Mi giny travay léspri - ga konm fi - Protéz la kaz ti sa dormi.
Mi kas lo sor, sèrvis i rèzis p’amwin.

Vien pa kasèt poul nwar dan mon zasièt manzé
Movékozman si ou minm va artonmé.

Krwazé d‘somin mi anbar bébét
Lao Brulé mi anpés volkan débordé.

Mi giny géri lo zam - vivan kom mor -
Si ti bril in bouzi mové koté
Ma ni souflé Si ti kri lo diab ma apél bondié

Fo pa larg mové kozé
Kan sizér la fine soné

V’ariv la fét, ma zwé zako
Ma fé la kèt pou in lané
M’asté in stati pou mwin priyé
Vèrs in boutéy lo ronm la rak dési pou batizé.

Pran pa mwin pou in klosar
Véy plito mon manir klosé
Rèt kas gro bwa-la si mon dorsal.

Lés dann ton pos ton ti moné
Mi vé pa tous ni piès ni biyé.

Gét inn ti syin pou la sas
Tang kour pli vit lérk rant lété.
M'vé pa larzan Tié in koson pou boukané,
Si zamé ou néna in ti kour
Zit pa kéy inn ti bouké.

Si ou na d’liv ou pé osi doné
Mé lés laba ton karné sékié.
Mi pran pa la kart é mi fé pi krédi,
Out kaz, sofkoman i dwa byin résté,
Inn ti pous kafé pou rins mon gozié.

V’ariv la fét, ma zwé zako
Ma fé la kèt pou in lané
M’asté in stati pou mwin priyé
Vèrs in boutéy lo ronm la rak dési pou batizé.

Mon boush lé anpaté
Ék do sél Mon lang i risk pa fourshé
Langaz do fé i shof mon gorz
Léspri la fini mont dési mwin
Mon nombri antéré Létansalé
I done amwin la fors pou kontinié
I rouv mon kat zié kan sizèr la soné
I di amwin tout bann sékré.
Done amwin ton min lami
É ma gardé
Ousa santié lavnir va déviré
Na in prézans ou la pankor santi
Na in puisans ou la pokor doviné.
Sér ti féy la dan ton min
Mié vo ti abiy dovan-dérièr
Pangar zinvizib va souké.
Mi koné twé la pèr,
Mé i fo ta dominé, so frison lo kér,
Tansion, ton tansion sa monté, in zour ta tonm kriz.
Po évit sézisman port so ti kolié
Sét la amwin minm la trésé.
V’ariv lér la mor Fodra ti giny désoté.
An plis parol lo prèt Miévotisamèt
Ti méday la dan ton kolé.