Sintespédi

Sé in tèks pë di in sin texto anvoyé santo expedito po Sintespédi

La rouv kanal fonnkèr.

é Zitte pa di mersi

parkoman Sintespédi i anvoy le mo fon’n kèr.

Na inpé i voi li rouj le san

Romin Larméni la rante krétien

La koukoune in martin

La kri « fé demin »

Tonton Pédi la fé toudsuite po toute suite sate i fo fé zordi.

Le diab, souvandéfoi na son jour,

i sanpasse pa pran le kor in martin

na pli joli voi i korbo.

E lé pli fasil pèz sou talon in martin k’in dragon.

N’inpé i …

Na in péi

Son kèr lé rouj

Volkan

Konbien le san la fine koulé

Na in péi

Son po lé rouj

Lankan

Koman le san la fine koulé

Zordi

Na in péi

Son lespri i vavang

Dann la kour toute bondié

Na inpé i ….

Rouv delo dann galé

Na inpé i ….

Ramass delo

Na inpé i ….

Mèrsi bondié la done delo

Na inpé i ….

Rèv mèt defé

Na inpé i ….

Mèrsi bondié nana solèy

Na inpé i ….

Prièr 2.0

I anvoy sin-texto

Po ansorte azot

Po di « mèrsi »

I like in ex voto

é Zitte pa di mèrsi

si t'a rame la vï

Zitet pa di

Si t’a rame la vi

Zitte pa di mèrsi

Zitte pa di si shap Hell-Bourg

Zitte pa di

Si shap, el bour

Devan la porte

Na la limièr

Dérièr la porte

Napoin lonbraj

Dési péron bouji po éklèr la prièr

Po étèl moune

Lamour

Po étèl moune

Antour

Po étèl moune

La kour

Po étèl moune fé le sour

Po intèl ? in tour.

O di « zordi ! atann pa demin po tir la Cras ».

Vitman vitman

Tèl la prié

Tèl la pri

Santo expedito

Tèl la di

Tèl la fé

5XP10

Sintex pé 10

Ek 5 lèt dan nout boush

Tout dézir i bèk la klé 10

Tèl ou demann

Di mèrsi

Zordi mèm v’arivé.

D’amoin la santé

Po shanté

Mèrsi la santé la shanté

D’amoin le mo

Po di fonnkèr

Mèrsi le mo la di fonnkèr

D’amoin lamour

Po fé lamouré

Mèrsi lamour la fé lamouré

D’amoin le kèr

Po avansé

Mèrsi le kèr la avansé

Mèrsi po

Mon zanfan

Mon santé

Mon lamour

Mon fami

Mon diplome

Mon permi

Mon loto

Mon kaz

Mon rèv

Mèrsi po annavoir

Ramèn lantante

Ramèn lamour

Ramèn la vi

Ramèn larjan

Ramèn la pé

Ramèn mon fanm

Ramèn mon bonom

Ramèn mon fiy

Mèrsi bien Sintespédi

Madame intèl v’arèt fé komèr astèr

Mon voizin v’arèt fé dantèl

Mon frèr v’arèt fé

Aranz ali, v’aranj amoin.